عروس خواطر العشاق نصائح معلومات فوائد تجارب

عروس خواطر العشاق نصائح معلومات فوائد تجارب

سلام آل خواطرالعشاق / يسعد مسائكم أهدي هذا الموضوع او الملف المتواضع إلى كل فتاه تستعد لرحله حياه جديدة .. مفهوم الزواج الصحي } هي رحله إلى عالم اخر المفترض ان تكون أبديه .. مليئه بالتسامح والتعاون .. عنوانها الصدق والإخلاص .. وعمادها الثقه والمحبه .. ويسودها الكثير من الإحترام المتبادل .. ولكن قد لاتنطبق تلك الشروط على كل الزيجات ,لإسباب شتى .. غالباً بسبب النماذج الحياتيه السيئه وربما بسبب تخلف فكري او زواج اجباري غير ارادي اللتي يعايشها الشباب والشابات في محيطهم االآسري .. ولكن .. بالكثير من الحكمه والصبر والإطلاع .. نستطيع تغيير الأفكار السلبيه لأخرى إيجابيه .. همسه لكل فتاه مقبله على عش الزوجيه } في البدايه وقبل كل شيء .. انا ضد الزواج بالسن المبكر .. لأسباب كثيرة .. تحديدا وخاصه في وقتنا هذا .. ف قبل 20 سنه كان سن ال18 يعتبر سن ناضج جدا وهناك من قد يتزوجون وهم اصغر من هذا السن كـ 15 او حتى 16 وغالباً يكونوا امهات بهالسن .. لكن في وقتنا هذا ولاسباب اجتماعيه كثيرة .. اصبح السن المناسب للزواج من وجهه نظري 20 فما فوق .. وال27 فما فوق للشاب .. رغم أن لكل قاعدة شواذ .. وأن فية فتيات وصلو ال30 ومازالو بدون نضج .. لكن اتكلم عن القاعده العامه .. للأسف الشديد أنه مازال يوجد فتيات يعتبرون الزواج نزهه .. وترفية ومطاعم وسفر وسعه صدر وهروب من ضغط الأهل وتزمتهم .. وهالنظرة السطحيه هي سبب لارتفاع معدل الطلاق بشكل مخيف .. سمعت بنت يمكن حول ال21 عمرها .. تقول يارب متى اتزوج عشان يطلعني زوجي عشان ابوها متشدد على ع عائلتهم ب عدم الخروج الى نزهات وغيرها ..!! شوفو العقليه الزواج مسؤوليه فكريه وقبل فكريه فـ هي جسميه .. محتاجه اتزان عاطفي وتوازن فكري ومنطقي .. محتاجه طوله بال وصبر وحكمه عشان ينجح ويستمر .. واكيد الشاب له دور كبير بالموضوع لكن انا عني احمل الزوجه 60%من اسباب نجاح الزواج من عدمه .. لأن المرأة تمتلك اسلحه اكبر واقوى من اسلحه الرجل .. ولأن كيدهن عظيم فالزوج يحتاج بعض الأحيان جزء يسير من هالكيد عشان يرضخ .. وكل هالأمور ماتتم بدون تروي وصبر .. وربما بعض الرجال بسبب علاقتهم السابقه بنساء اخريات يعتقد انك مثلهم وربما العكس لكن دلعي زوجكك بلاش يطير لغيركك .:،8 لكن مو معناه انك تدخلين بيت الزوجيه وانتي راسمه في ذهنك صورة الأسد اللي محتاج ترويض لأن هالفكرة راح تبين على تصرفاتك وراح يفهمها الزوج ويمكن يكون هو بعد شايل نفس الفكرة ويبدأ صدام فرض السيطرة من اول يوم ..

المصدر: مملكة خواطر العشاق - من قسم: مملكة عالم حواء

 

شكراً جزيلاً لموضوعك يا اميرة قلبه

موضوع شيق ومفيد ابداع تواجد ونشاط الامحدود

موضيعك لها تميز من جميع النواحي

ترتيب ,وتنسيق يعطيك العافيه

نشاط ملاحظ في جميع اقسام المنتدى

مبدعه رائعه في كل مواضيعك

دمتي كما تحبين

الصراع الأبدي في كل شيء ! اهلك وأمك } انا في حالة استغراب .. ليش كل بنت تتزوج تكون مكونه هالفكره السودة عن اهل الزوج ؟ وبالذات الخاله او ام الزوج ؟ من اهم نقاط الخلاف في اي زواج هي هالنظرة السيئه المسبقه لأهل الزوج .. وهذا غالباً بفضل اللي يساهمون بشحن هالفكرة براس كل عروس من محيطها السالب .. ( لاتسكتين لهم ولا تعلمينهم لاتعطينهم وجه تراهم بعدين يستقوون عليكِ ..) طيب ليه ؟ لية ماتدخل العروس لبيت الزوجيه وهي في بالها انها بين اهلها الثانين ؟ لية ماتعتبر ام زوجها ام ثانيه لها ؟ لها حقوق عليها ... ولية تستكثر منها كل كلمه وتعتبرة تدخل بشؤونها وغيرة منها ؟ .. ترا عادي ام زوجك تكون تحبك وتنصحك وتبي لك الخير موب لازم قالت كذا يعني هي تكرهك عادي مثل م احيانا امك تنصحك بطريقة غير لبقه من خوفها عليك ام زوجك نفس الشي انا معكم ان فيه اهل زوج اطباعهم سيئه ويجي منهم مشاكل .. لكن انتي ادخلي عليهم بقلب مفتوح ولو شفتي منهم اساءه ممكن وقتها تخلين العلاقه رسميه شوي بس بدون ماتغلطين او يجي منك قصور خلي دايم رايتك البيضاء وخليك راعيه الاوله .. حتى لو مانفع فيها راح ينفع بزوجك صدقيني الزوج لما يشوف زوجته تعامل امه بكل حب راح تكبر بعينه .. لكن في نفس الوقت .. لاتخلين حياتك كتاب مكشوف لهم حتى لو كانت علاقتكم كويسه .. ترى هالكلام مهوب تناقض مني .. لكن اني احب ناس واودهم وازورهم بشكل دوري واقوم بواجبي واساعدهم وقت حاجتهم مو معناه انهم يعرفون كل صغيرة وكبيره عني وعن حياتي اهلي بعض الامور لما تكشفينها ممكن هي تكون شراره المشاكل مثلاً لو عند زوجك خوات لسه ماتزوجو .. او متزوجات وازواجهم علاقتهم فيهم سيئه .. موب لازم تجلسين قدامهم وتسولفين عن هدايا اخوهم لك وطلعاتكم للمطاعم وحركاتكم الخاصه .. ماراح يفيدك هالشي بالعكس .. الا ممكن تخلي الغيرة والمشاكل تبدأ بينكم ومثلا لو قلنا اهل زوجك عندهم صفات سيئه وانتي تبين تسوين فيها الطيبه وقلتي ع نيتك مشكلة حصلت بينك وبين زوجك راح تصير فتنه وبيعرف زوجك وبيقل انتي كل شويه تروحين تشتكين عليه احفظي اسرار بيتك م اقلك اكتمي بس اعرفي وادرسي الشخص الصح يلي ممكن يخفف عنك ويعطيك النصيحة الصح دون م يتدخل ان يكلم زوجك .. يعني باختصار خليك ذكيه في كل امورك .. واعرفي وش اللي تقولينه واللي ماتقولينه القناعه والرضا بما قسم الله لك } أول اسلحة الدمار الشامل لكل علاقه زوجيه هي المقارنه .. لما تحطين بين عيونك نموذج او عده نماذج وتكرسين كل حياتك مع زوجك في المقارنه معه راح تخسرين زوجك وتخسرين نفسك معه .. لأنك راح تدفنين كل لحظة سعادة بحياتك حتى لو كانت صغيرة بس لانها ماوصلت لمستوى النموذج اللي ببالك .. خليك دوم قانعه ومؤمنه ان الزواج نصيب مقدر لك من رب العالمين من يومك في بطن امك ومقارنتك بحياه غيرك فية اعتراض على قضاء الله وقدرة لك مو شرط يكون زوجك استنساخ عن زوج اختك .. او عن اخوك او ابوك او او مو شرط لو زوج اختك ولاصديقتك يسفرها ويشري لها ويعطيها وزوجك لا انك تقلبين الدنيا علية لكل شخص امكانياته وقدراته وتفكيرة .. ومو شرط ان فلانه من الناس تسافر وانتي لا معناه هي سعيدة وانتي لا هذي كلها مظاهر صدقيني ماتستاهل انك تهدمين حياتك عشانها .. فية ازواج كل سنه يسافرون ويصرفون ويشترون بس تلقين علاقتهم الخاصه فيها خلل ولا عندهم نقص بجانب آخر يكون متوفر عندك .. الحياة ماتكمل لأحد .. فيها السعاده وفيها الشقا .. محد سعيد على طول الخط ومحد شقي على طول الخط خليك راضيه بقسمتك .. وانسي وش عند الناس .. وانشغلي بتطوير اللي تملكينه وتحسينه بدال ماتنشغلين بالتحسر على حظك وعينك على حظ غيرك ومن جهه ثانيه .. لاتاخذين تجارب غيرك مع ازواجهم وحل مشاكلهم قدوة لك وتطبقين نصائح عشوائيه من صديقاتك ولا خواتك على زوجك كل رجال بالعالم له طريقه مختلفه بالتعامل .. حتى لو كانو اخوان من ام واب تلقين كل واحد له شخصيه مو معقول ان اللي ينفع مع زوج اختك ولا صديقتك ينفع مع زوجك انتي لحالك ومع العشرة تعرفين وين مفاتيح زوجك .. هذا لو كنتي نبيهه وذكيه لاتسمعين لتحريض احد من محيطك على زوجك ترى انتي اللي بتخسرين تنصحك وحدة وتقول لك ماعليك منه وسوي وقولي وحطي همن تطبقين كلامها وتنقلب الطاوله على راسك وهي تروح ترقد بحظن زوجها قريرة العين ماجابت خبرك خليك ذكيه ولا تخلين حياتك ومشاكلك واسرار بيتك وغرفتك عرضة للتحليل والتكبير والتصغير احتار ساعات لما تجيني وحدة تشتكي من زوجها وتطلب حل .. ولا تقول وش اقول له لأني مااكون بقلب الحدث وماادري بالضبط ليش تطور الموقف وليش هو اساسا يتصرف كذا يمكن تكون هي بتصرف منها قادته للتصرفات .. وكبرت المشكله ولو كان تفكيرك ان الزواج ان زوجك يفضى لك طول الوقت ويدلعك ويشتري لك وتبين تغيرين شكله لمهند التركي .. ترا وربي تحلمين .. لاتقولين صديقاتي كلهم ازواجهم حلوين ليش انا لاء م ابيه ومدري ايش اوعي تفكيرك انتي بتتزوجين طيب مسؤليه وخلي جماله وشكله ع جنب خليك ب اخلاقه وتعامله لو كان زوجك م يجيب لك هدايا هذا م يعني انه م يحبك وان تغير عليك يمكن الميزانيه م تساعد حاولي م تتطلبين كثير اطلبي بس اعرفي ميزانية زوجك اول وبعدين اطلبي لاتثقلين مشان لا يمل منك ويطير منك ^.^ صعب جدا الحكم في هالنقطه .. لأن فية حريم كثير وللأسف مايشوفون اخطاءهم ..

الاستعداد للزواج } الاستعداد الجسدي .. هو العناية المتواصله بجسدك ويلي المفترض ان تبدأ بعدالبلوغ مباشرة (مو قبل الزواج بشهرين زي بعض البنات اللي يلفون بقسم العناية بالبشره ) الجسم والبشرة ماراح يكونون بوضع مثالي في شهر ولا شهرين .. والمفترض أبدال الحلول السريعه واللي يمكن تنفع ويمكن لا خلي عنايتك قبل الزواج بكثير وتكون عناية بسيطه وغير مكلفه لكن بالتأكيد نتايجها حتكون مستمرة ورائعه لما يجي وقت خطوبتك وانتي جسمك ناعم ومتناسق ولونه موحّد وبشرتك نضرة ومتألقه حيكون بالك مرتاح وثقتك بنفسك عاليه وراح يكون كل همك مركز على تجهيزك وحفلتك ورتوش بسيطه من العنايه يبقى عاد الاستعداد النفسي .. واللي لازم تنمينه بالقراءة في كتب الثقات والمختصين مهوب بخلطات البيض والخميره .. الاستعداد والتجهيز لحفل زواجك } يبدأ التجهيز طبعا من الايام الاولى من فترة الخطوبه , وتحديد موعد الزواج وهي اختيار القاعه وحجزها حتى لو كان الموعد بكير لكن افضل لك عشان تختارين القاعه اللي تناسبك وتناسب امكانياتك وعشان تعرفين وش تبين تحطين بالضبط لحفلتك من تجهيز والوان وكل ماكان هالشي مبكر كل ماكان التحضير دقيق ومرتب .. ساعات لما تتاخرين بالحجوزات تضطرين تتنازلين عن اشياء كثير كنتي تتمنينها بسبب ضيق الوقت او بسبب انشغال اللي يوفرونها لك .. من وجهه نظري مو ضروري تكون القاعه مكلفه وباهضة الثمن عشان يطلع زواج حلو ومرتب هذا في حاله كانت امكانياتك الماديه ماتسمح في ظل هالغلاء المعيشي اهم شي الذوق صدقيني .. فية زواجات حظرتها مكلفه مئات الألوف بس كلها دفاشه وبدون ذوق اهم شي يكون غالي وبس .. والعكس .. حضرت زواجات في بيوت .. وكانت قمه بالترتيب والنظام والاناقه يعني لاتخلي القاعه عائق امامك .. بالرغم اني مع انه يكون يازواج مرتب وانيق او زواج في البيت اما اللي يحطون كل ميزانيتهم بقاعه كبيرة همن تخلص فلوسهم ويضطرون يكملون بتجهيزات رخيصه بس عشان تناسب امكانياتهم ماانصحهم بصراحه لانهم لابيكونو راضين ولا مقنعين ضيوفهم ولو حطو هالمبلغ في تجهيزات حلوة في بيتهم او صاله صغيرة من صالات الفنادق الصغيرة بتكون افضل .. طبعا اكيد العرايس اللي لفوا عالصالات والقاعات يعرفون ان سعر القاعه احيانا مايشمل بعض الاضاقات .. يعني فية قاعات مثلا يعطيك سعر محدد مثل 60 الف او 50 الف .. بس لو دققتي بالعقد بيكون شامل العشاء لــــــ> 150 شخص فقط ... ومازاد عنه بسعر أخر ... بعد بيكون شامل عدد معين من المضيفات ويمكن يكون هالعدد مايفي بحاجه معازيمك .. انتي بالاول حددي عدد المعازيم بالاتفاق مع اهل الزوج .. وبعدها راح تكون الصورة واضحة امامك طبعا انا اتكلم على اساس ان الصاله والزواج من شؤون اهل العروس كما هو متعارف علية في محيطنا لكن في بعض المجتمعات يكون الحفل كامل على اهل العريس او بالشراكه بينهم فهالشي يعتمد على استثنآت كثير .. لكن عالعموم .. المقصد هو البدء بترتيبات الحفل من وقت مبكر .. عشان تتجنبين المفاجآت الغير ساره ومثل كل شي يخص اناقتنا ومظهرنا كل شي لة موضه متغيرة وهالشي يسري على تجهيزات الحفل .. من كوشة وزفه وتقديم وخلافه لازم قبل تختارين اي شي يتعلق بالحفل تشوفين وش الدارج .. ومايمنع طبعا انك تبتكرين فكره خاصه بك ومايكون حفلك مستنسخ من غيرك .. حلو انك تتميزين بشي جديد ..حتى لو كان بسيط ... الموضوع مهوب صعب ولا مستحيل .. بس كل اللي محتاجه رواق شوي وتفكير وبحث ومايمنع من طلب المساعده من ناس عندهم خبرة بالموضوع .. ومثل ماقلت لك .. تحديد عدد المدعوين من اهم نقاط الانطلاق للتجهيز .. لانه راح يحدد لك حجم الصاله اللي بتحتاجين وعدد المضيفات وعدد صواني التقديم .. لان فية ناس الله يصلحهم يعزمون عدد بدون التزام بمساحه القاعه .. فيجون الضيوف ساعات مايلقون مكان .. او العكس .. ياخذون صاله كبيرة ويستعدون بصواني كثيرة وعشاء كثير ومايعزمون الا عدد محدود .. وتجلس تجهيزاتهم بحلوقهم .. التخطيط مهم جدا في التجهيز .. لاتغفلين ولا نقطه حتى لو كانت بسيطه في حال كنتي تبين حفل متكامل ومرتب .. ولاتتركين شي للصدفه .

بدايه التجهيز } الخطوة الثانيه بعد حجز القاعه وتحديد الموعد هو فستان الزواج واللي المفروض يكون اول شي تبدين فية من تجهيزك .. لأنه اهم قطعه بجهازك .. وغالباً تفصيل فستان فخم ياخذ من شهر ونص الى شهرين شغل .. وحلو انه يكون بدولابك قبل الزواج بفترة كافيه في حال لو لاقدر الله ماطلع حلو او شي, يكون فية مجال للتعديل او البحث عن بديل بعد ماتخلصين من هم فستان لزواج .. جيبي نوته وقلم .. واكتبي التجهيزات المهم اللي تحتاجينها حسب مهرك وميزانيتك اللي ممكن تزيدين بها على المهر وعلى حسب ظروف زواجك واهل زوجك .. مثلا ً.. تجهيز اللي بتسافر لبعثه بعد الزواج مباشرة يختلف عن تجهيز اللي ماراح تروح .. وتجهيز اللي بتسكن في بيت لحالها يختلف عن اللي في بيت حموله كل زواج وله ظروف .. في بنات كثير تتزوج وبعدة باسابيع تسافر لمده سنه او سنوات .. وفي هالحاله ماراح تحتاج فساتين سهره بشي وشويات .. لانها ماراح تستخدمهم .. ولا راح تحتاج اشياء كثير تحتاجها اي عروس مقيمه .. تقسيم المهر } نجي لاهم نقاط تقسيم المهر واللي اغلب العرايس يسألون عنها .. المهم يختلف من بنت للثانيه .. فية اللي مهرها 30 الف .. وفية اللي 300 الف .. كل وحدة وظروفها وامكانياتها وعادات مجتمعها ومدينتها .. وفية بنات اهلهم مقتدرين او هي موظفه, ولو ماكفى المهر تقدر تزيدة لكن فية بنات امكانياتهم على قدهم ولازم يقسمون المهر بحكمه وذكاء .. لان من حق كل عروس تكون انيقه .. حتى لو ماجهزت من الماركات العالميه .. وعلى فكرة .. موضروري تضفين السوق كله وكانه بيسكر وماعاد هوب فاتح اهم شي يكون عندك الاساسيات وفساتين مناسبات مع اكسسواراتهم وبعض الاحتياجات الاساسية لكل عروس .. بس الضف بالجمله ذا ماله سنع الموضه تتجدد كل كم شهر .. وممكن تحملين بعد شهر او شهرين وماعاد تستفيدين من كل ملابسك وبدال ماتشترين كميه كبيرة من التجهيزات العاديه عشان مهرك قليل خليها كميه قليله بس من ماركات جيدة وتواجه حتى لو كررتيها .. مثلا ً.. بدال ماتشتريين بـــــ> 4 الآف 10 شنط من نوعيات متواضعه .. اشتري بس 2 من ماركات حلوة ومعروفه + كلتش سهرة .. وصلى الله وبارك ... على الاقل وين ماتروحين الا شنطتك حلوة وتواجه لان للاسف الحين صار اول حكم مسبق على مظهرك يتم من خلال شنطتك .. قل لي وش ماركه شنطتك اقول لك من انت!!!! هذا مجرد مثال فقط ,, عشان بس توصل الفكرة .. ولكل قاعدة شواذ ولكل وضع استثناء .. انتي تحددين احتياجاتك حسب مجتمعك مثلا بعض المجتمعات يكون المهر كامل للزوجه بس لاغراضها الخاصه والزوج يتكفل بتجهيز البيت كامل من ادوات مطبخ واكسسوارات وخلافه والبعض لا .. يكون مطلوب من الزوجه تشتري من مهرها المواعين والمفارش واطقم واكسسوارات الحمام الخ .. يعني هالشي انتي بس الاقدر على تحديده .. وعلى ضوءة تقسمين مهرك وتخصصين لكل حاجه قيمتها نصائح مهمة } لما تشترين أي شي خليه قدامك ... او اكتبي بالنوته وش شريتي بالضبط ومن وين واهم شي قيسيه وتأكدي من مقاسه بالضبط عشان تبدلينه في وقته قبل تنسين لانه كثير بنات يجلسون كم شهر يجهزون وينسون وش اشتروو وممكن يكررون القطع والالوان مع الربشه .. الافضل لو تشترين المعلاق المتنقل مثل حق المحلات .. تلقينه متوفر باماكن كثير مثل هوم بلازا + جدة للديكور + ايكيا وتشترين المعاليق ةاكياس الفساتين .. وتخلينهم قدامك بالغرفه معلقين ومرتبين ومغلفين عشان وقت النقل يكون سهل لك بس تشيلينهم وتعلقينهم مكانهم ..ومنها يكونو قدامك وتعرفين وش شريتي ووش ناقصك حتى اللانجري اشتري البوكسات حقت ايكيا ورتبيها فيها .. خليها جاهزة عشان ماتنحاسين من النقل طبعا اول شي بعد فستان الزواج هو فساتين السهرة .. اشتريها او فصليها وارتاحي من همها .. لان الاشياء الثانيه كلها جاهزة بالسوق وتقدرين تخلصينها بسرعه بس اي شي يبي خياط هو المشكله.. لو حبيتي تجربين مشغل ولا خياط جديد, لاتغامرين وتحطين اقمشتك الغاليه عنده وانتي ماجربتية قبل! لان فية ناس اللي يصلحهم ماعندهم اخلاص بالمدح .. يمدحون لك خياط ويوصلونه السماء وممكن يكون صدفة ضبط معم وانتي تتوهقين .. جربي اول مرة بقطعه عادية وشوفي نتيجتها لو تمام خلاص كملي معه .. عشان كذا محتاجه انك تبدين بالتجهيز بدري حتى لو زواجك باقي له 5 او 6 شهور .. صدقيني الوقت يمر بسرعه وماتدرين الا باقي شهرين او اقل وتتكركب كل امورك فوق بعض

التنظيم والترتيب من البدايه راح يسهل لك كثير صدقيني .. اكرة شي لما تمتلي ارض غرفتك باكياس المحلات واللي ماتدرين كل كيس وش فيه!! وإذا بغيتي تنقلينهم لبيتك, الا كل شي معفوس واللي يبي كوي ,واللي نسيتي تكملينه من العفسة !! ملابس البيت طبقيها, يا في شنطة سفر او بوكس كبير .. واذا عندك قطع ملابس سابقة من مرحلة العزوبيه في حاله جيدة مايمنع تحطينها مع جهازك على الاقل مع لبس البيت ... بنطلون ,تي شيرت , فستان خفيف, الخ اهم شي يكون مو مكروف .. وحلو لو تحطين معاهم معطرات الملابس مثل اللي عند لايف ستايل .,, عشان لين طلعتيهم للدولاب تكون ريحتهم فواحه .. الشوزات خليها بعلبها .. او اشتري علب او اكياس خاصه بحفظ الشوزات .. ( تلقينها عن إيكيا + هوم سنتر + في شارع السويلم يبيعون أكياس قماش تنفع للشوز حلوة ) العطورات والمعطرات والكريمات والميك آب خليها كلها لآخر اسبوعين قبل الزواج! خبرك مع جونا الباريسي يمكن لاقدر الله تبوش ارواجك ولا شي ,, وكلها ماتبي لها اكثر من يومين او 3 وصدقيني اهم شي النوته والقلم راح يسهلون عليك التجهيز فوق ماتتخيلين اكتبي اي معلومه تمر عليك .. اسم محل اسم كوافيرة اسم مشغل اسم عطر اي شي يمر عليك دونيه .. وخليك منظمه ومرتبه وماشية على جدول معين بقدر الامكان .. طبعا قبل كل شي .. لاتنسين بعد ماتحجزين القاعه تحجزين الفرقة والكوافيرة واي شي يحتاج حجز مسبق .. ولاتنسين انك في نفس وقت التجهيز لازم تكثفين العنايه بشعرك وجسمك كل ليله وانصحك نصيحه تسوين جلسات ليزر لشعر الجسم .. راح ترتاحين من قلب حتى لو ماأمداك تكملين كل الجلسات .. لأنه من أول جلسه حتشوفين نتائج رائعه ولو طلع الشعر حيكون خفيف جدا مثل الوبر والمسام حتصغر .. وبعد لو عندك مشاكل جلدية ولا تصبغات ولا تساقط شعر لازم تحجزين بمركز متخصص وتسوين جلسات علاجيه ..

قائمة مقترحه باحتياجات العروس } طبعاً القائمه التاليه ليست الزامية .. بل مجرد نموذج يشمل اقل الكميات المعقوله, وحاولت اغطي بها ادق واهم احتياجات كل عروس .. ومثل ماقلت كل مجتمع وايش متعود ان العروس تشتري .. : * فستان الزواج .. واللي يبدأ سعرة في اقل الأحوال من 3000 ريال فمافوق محلات مقترحه في حال الجاهز: (بروفينيياس + رهيد + مختارات العبد الواحد + الندى الفضي + انتي الاميرة وكذا محل بعد وكلهم بالعليا العام ماعدا الندى الفضي في طريق الملك عبد العزيز ) * فساتين السهرة .. واتوقع 5 فساتين عدد مناسب .. وممكن اقل لو اهل زوجك موب راعين مناسبات او انهم في مدينه اخرى وطبعا في ابسط الاحوال يبدأ سعر الفستان الواحد من الف ريال فما فوق .. (كفالي في ساكس افنيو + حياه مول + العليا مول + سنتريا في حال الجاهزة مركز نجود + هارفي نيكلز ) (الاقمنشه : عمر بن صديق + اسواق الاندلس + العليا مول + رويال مول + الرمال + صالح الرماح ) * اطقم مناسبات وعزايم وفساتين عاديه ... اتوقع من 6 ل7 اطقم كامله كافيه جدا .. (المملكه + الفيصليه + غرناطه + حياة مول + صحارى + سنتريا + بنوراما مول+ السواني ) * شنط اليد .. مثل ماقلت سابقا .. اتوقع 2 من ماركه جيدة افضل من عدد كبير وانتي حرة لكن من 2 الى 3 اتوقع عدد معقول .. + شنطة او 2 للسهرات والمناسبات .. ولو ميزانيتك مبحبحه ممكن تزيدين العدد .. (سنتريا + المملكة + الفيصلية في حال لو تبين ماركات ) أو: ( الدو + ناين ويست + تشارلز أند كيث + ميلانو سكوير ) * شوزات للسهرة .. اتوقع 3 كفايه .. اسود ونيوود ولون مناسب للسهرات ..ممكن ذهبي او فضي او برونزي والشوزات الحلوة للسهرات تبدأ من ال200 ريال فما فوق طبعا مو ماركات أكيد .. + 2 او 3 شوزات عادية متفاوته الاطوال + شوز مشي او 2 في حال سافرتي لشهر العسل مثلا (ميلانو سكوير + الدو + ناين ويست + تشارلز اند كيث + زارا + فينيسي .بس لو تبين ماركات عالمية عندك المملكه وسنتريا ) * لبس يومي ولبس طلعات عادية .. جينزات + تي شيرتات + قمصان .. (نفس الاسواق اعلاة + بيرشكا + مانقو + زارا + نيويوركر + ريفر آيلند+ كوتون +نيولوك h&m ) وكثير محلات غيرهم للبس العادي * لانجري وقمصان للنوم مختلفه الالوان والقصات والاطوال .. لانك ماتدرين شيخ الشباب وش يفضل * ملابس داخليه متنوعه ومختلفه ويبي لك كمية منها + اشكال من البرا للسهرات والعزايم وللاوقات العادية .. واذا محتاجه مشد مناسب بعد لازم توفرينه (ايتام +لاسنزا + وومن سيكريت + لافي ان روز + الريّس لو تبين مشدات كويسه + فية كم محل في شارع الوزير مثل ياسمين والعساف مثلا ) ماكتبت نعومي لأني اكرهه من قلب احسة خربوطي * طقم فوط وارواب +كم حبه من الفوط المختلفه اضافيه + مفارش والحفه مختلفه (المتجر العام في طيبه + المتجر الوطني في مركز بن سليمان + الثنيان والشلهوب في اوشيقر) (لو تبين شي توب عند دبنهامز + باخشوين والبيت السعودي في شارع ال 30 ) * اكسسوارات للشعر وللبس .. مع انه العروس لازم في المناسبات تلبس مجوهرات بس بعد تحتاج كم قطعه اكسسوار حلو (شادن في حياة مول و القرعاوي + منير للساعات عندة اكسسوارات اقنر موجود بالمملكه تحت ) وفية بعض الاكشاك في اغلب المولات تبيع اكسسوارات مشكله * عطورات لك .. اتوقع 5 كفايه بس يفضل أثنين منهم باللوشن تبعه هذا اذا ميزانيتك محدودة لان العطور الحين مكلفه .. وممكن تشترين 2 رجالية (باريس غاليري + دبنهامز + وجوة + سيفورا + هارفي نيكلز + ساكس افنيوو ) * دهن عود من نوعية فاخرة .. يكفي توله مقسمة على 4 ارباع .. وممكن تكون هال4 كل وحدة من نوع من باب التغيير + كمية من البخور حتى لو بسيطه .. اهم شي يكون ريحته حلوة (سيد جنيد عالم + عبد الصمد القرشي + الماجد + الدخيل + الصفوة + ياس + باريس غاليري ) * كريمات لجسمك وبشرتك .. ومعطرات للجسم ومو شرط تكون كثيرة .. اهم شي تكون كويسه ومزيل مناكير (صيدليه الحبيب + هارفي + سيفورا + بوتس +بودي شوب + نكتار ) * مجموعه من الميك آب يحتوي على اهم الاساسيات : كريم اساس + بيز + بودرة كومباكت + بودرة سايبه + بلاشر 3 الوان كافي + ارواج 6 الوان حلو .. وممكن مثل ماقلت تشترين اكثر لو معك +نوع او 2 اضاءة +كونسيلر +كم قلم كحل وماسكرا وكم قلم محدد + محدد حواجب وكم لون ماناكير +باليت شدو او كم لون متفرق +مجموعه من الفرش الاساسيه. تقريبا ذول الاساسيات واللي مايكمل المكياج بدونها .. بغض النظر عن الكميات بس تقريبا 2000 ريال ممكن تجيب لك هالاشياء بس بتوازن ..يعني مو شرط تلتزمون بالعدد أعلاة لو ميزانيتكم مفتوحة اشتروا أكثر بس انا حطيت اقل شي معقول .. (نفس محلات العطور + ماك ) * اغراض مهمة تتبع التجميل .. مثل عدة العنايه بالاظافر + اغراض للشاور والسنفرة وتنظيف الجسم + قطن باشكال متعددة ومزيل للميك آب .. (صيدلية الحبيب + نزيه + شارع السويلم ) * اجهزة لتصفيف الشعر .. (نزيه + اكسترا + شارع الخزان ) * معاليق للملابس واكياس لحفظ الفساتين (جده للديكور في شارع العليا العام + ايكيا ) * طقمين عبايات حلو للمناسبات + عبايه حفيفة وماتكون طويله حيل في حال السفر مع شوز فلات (الاختيار الاول + فاشن لاين + السلطانه + ميد نايت + والنجمه الفضيه في رويال مول وطيبه ) * طقم سجادة صلاه وفي حال كنتي ببيت مستقل تحتاجين على الاقل 3 زيادة للضيوف ( الراشد في اوشيقر وطيبه + الغيث في طيبه ) * اكسسورات لادراج التسريحه لترتيب اغراضك فيها ( ايكيا + دايسو ) * شنط بمقاسات مختلفه لحفظ الميكآب سواء داخل الادراج او في شنطة اليد (لايف ستايل + سيفورا + ماك ) * اكسسورات لغرفة النوم من شموع واطارات وخلافه .. (هوم سنتر ولايف ستايل + ايكيا + السواني + دبنهامز ) شنط سفر طقم (الشماسي +الجار الله +الصنّات وكلهم بطريق الملك عبد الله ) في حال كان تجهيز المطبخ عليك فانتي محتاجة الاساسيات واللي لازم تتوفر بكل مطبخ ومو شرط يكون متكامل ..لانة في هالحاله مهرك كله حيروح عالمطبخ .. لكن اهم شي طقم القدور + طقم متكامل لتقديم القهوة +طقم متكامل لتجهيز الشاي وسفرة وطقم ملاعق .. هذي اهم الاساسيات ..لكن لو بتدققين فالله يعينك ملاحظه : * كل المحلات اللي ذكرتها بالرياض فقط لأني ماأعرف بديل في مدن آخرى سوري . * القائمة مجرد اجتهاد كما كررت .. حاولت اخاطب بها متوسطي الدخل لأنهم أغلبية ..واللي ربي منعم عليها أنا مع أن الوحدة تنغنغ عمرها وتصرف مما أنعم الله به عليها والله يقويها , ‘ان الله يحب أن يرى آثر نعمته على عباده .

[align=center]

الليله الحاسمه وساعه الصفر } خلصنا من حتة التجهيز والترتيب .. واقترب موعد الحفل .. هنا .. ولو كنتي مرتبه امورك من بدري .. وومانسيتي شي راح تكون نفسيتك أكيد آروق والضغط بيخف عليك .. لأنك محتاجه استرخاء وصفاوة .. لاستقبال اهم لحظات حياتك . اخر اسبوع قبل الحفل لازم يكون لنفسك .. لجسمك .. للمسات الآخيرة لازم قبل الزواج على الاقل باسبوعين ترجعين تأكدين حجوزاتك .. الفرقه المصورة الكوافيرة الكوشه الخ .. وتحرصينهم على الساعه اللي تبينهم يكونون حاضرين بها .. خوفاً من أي مفاجأة لاقدر الله خصوصاً لو كنتي حاجزتهم من بدري .. عشان تركزين على الاشياء الثانية ..ولو كنتي حاجزة برنامج عروس في مركز تجميل ياليت تطلبين منهم اضافه جلسة مساج واسترخاء .. وتكون قبل الزواج بيوم .. راح تريحك من التوتر والشد العصبي .. وحاولي المستحيل انك تنامين الليله الاخيرة نوم مريح على الاقل .. واذا اضطريتي حطي كم نقطه من زيت اللافندر المركز على وسادتك .. عشان يساعدك على الاسترخاء والنوم يمكن كل اللي قلته اعلاة بيكون تنفيذه صعب شوي .. بس ان شاء الله تقدرين تسوينه لكن لاتسمحين لأي شي يكدر عليك ليلتك .. وخذي نفس عميق لو واجهتك اي مشكله طارئه لاقدر الله لأنه كله بينعكس على وجهك .. وراح يبين عليك بالزفه حتى لو حاولتي تخبين وحاولي تخلصين مكياجك وتسريحتك بدري عشان تاخذين راحتك بالتصوير قبل الزحمة والعجئة ولازم تاكلين اي شي حتى لو اجبرتي نفسك .. لأن اغلب العرايس ماياكلون ولا شي طول يوم الزواج وهالشي غلط جدا .. لاينخفض ضغطك ولا شي ويغمى عليك .. ان شاء الله لو عصير .. مو مشكله المهم شي يساعدك وينشطك .. وفية سبب آخر مهم جداً كثير من العرايس يغفلونة .. وهو أن الجوع راح يخلي ريحه نفسك غير مستحب ومايحتاج أكمل زيادة .. وهالشي أكيد محد راح يواجهك فية بليلتك .. حتى اهلك راح يخافون على مشاعرك سوري بس هذا الواقع .. وهالنقطة ذكرتني بشي مهم جداً .. وهو لو عندك مشاكل مع اسنانك ولا ريحه الفم لازم تكرسين لها وقت من ايام تجهيزك وتحجزين في مركز متخصص عشان تعالجين كل هالمشاكل لو عندك اياها .. التجهيز للسفر } طبعاً أغلب العرايس يباتون ليلتهم الأولى في فتدق (غالباً ) وهالشي لازم تحسبين حسابه وترتبين اغراض الليله الأولى بشنطة مستقله ماتروح مع دبشك او جهازك .. يكون فيها قميص الليله الأولى مع طقمين اندروير احتياط مع فستان خفيف فيما لو احتجتي تلبسينة قبل القميص .. وطبعاً أغراضك الشخصيه من مزيل ميك آب وقطن وكريم يدين وعطر ألخ .. ولاتنسين تحطين اغراض العنايه باسنانك ومعها نوع من معطرات الفم يعني .. عاد أكيد أنتي أدرى باحتياجاتك بس مجرد محاوله للتذكير .. ولو كنتي بتسافرين لشهر العسل بعد شنطتك لازم تكون جاهزة من قبل .. والسفر للخارج لة متطلبات بغض النظر عن كونك عروس .. يعني مثلاً السفر محتاج ملابس مريحه شوي ومافيها ترسيم .. زي وحدة عروس قالت لي عن سفرتها لشهر العسل تقول شايلة اكبر شنطة بالطقم وحاطه فساتين وملابس وش كثرها مااحتاجت ولا ربعها .. والمصيبة حاطة 5 شوزات هاي هيلز يالهوي !! وشلون تتمشين برا من الصبح لين الليل بالهاي هيلز ؟ اوكي فية شوزات عالية ومريحه وخاصة بالمشي .. بس مو شوزات العزايم ! تقول زوجها تململ منها .. كل مامشت ساعه جلست وقامت تتشكى من روجولها .. هذا غير الشنطة اللي توهق بها وهو يسحبها من محطة لمطار .. يعني اوكي عروس وتبين تكشخين بس لكل مقام مقال .. حتى الماركات العالمية عندهم لبس يصلح للسفر يكفي يكون معك 3 جينزات .. مع 4 او 5 تي شيرتات وممكن 3 قمصان او ماشابه .. لأنه الجينز عملي وممكن تكررينه كذا مرة مع كذا بلوزة .. وممكن 2 شوزات مريحه للمشي واحد عالي وواحد واطي شوي .. هي بس الملابس الداخلية وقمصان النوم اللي لازم تكون على عدد الليالي تقريبا .. ترى في أغلب الدول الأوربيه دايماً لبسهم عملي وبسيط .. وشكلك بيكون ملفت مع الترسيم الزايد هذا غير انه ساعات يكون فية تنقلات كثير بالعفش .. وراح يتعبكم بالجرجرة .. ونصيحه آخيرة لو وافق وقت سفرك وقت الدور الشهريه لازم تاخذين احتياطك .. منعاً للإحراجات يعني ..

[/align

[align=center]

نصائح متفرقه لحياه زوجيه مستقره } *مثل ماقل في البدايه , الزواج مو معركه كل طرف يروّض الثاني , ومو نزهه ولا سعه صدر ولا رحله تحقيق ممنوعات .. الزواج مسؤوليه جسيمه ولبنه بناء اسره واجيال راح يكون لهم دور في المجتمع سواء سلبي أو إيجابي .. فلو كنتي غير مهيأة لهالخطوة لاتستعجلين ., وماعليك من كلام الناس لقب عانس أفضل من لقب مطلقه .. رغم أن الطلاق موعيب إطلاقاً . * كل شي بالحياة ماينجح غير بالتخطيط السليم والمدروس .. وهالشي ينطبق على فترة التجهيز للزواج *مافية شخص بالكون كامل .. ومثل ماعندك عيوب فأكيد شريكك بيكون عندة عيوب .. لكن فية عيوب ممكن التغاضي عنها .. تجاوزيها ولا تدققين فيها ..ماعدا العيوب الأخلاقية .. (شرب ,ترك صلاه,ضرب,خيانه آلخ ) هالعيوب لايمكن تجاوزها ولا السكوت عنها .. لازم يكون لك رد فعل حقيقي تجاهها .. وسوي المستحيل عشان ماتحملين من شخص غير سوي أخلاقباً , لأنك راح تكونين الجانية وقتها مو المجني عليها *من أول تقارب جسدي بينكم لازم تكونين بحالة جسديه رائعه من كل النواحي .. ومايحتاج اوضح أكثر لأن الإنطباع الأول مهم للغايه عند الرجل .. ولو شاف منك مايكرة راح يتقزز منك خاصه لو كان شخص متطلب .. وماراح يغفر لك هالإنطباع الأول ولا ينساه .. لذلك أهتمي بأدق أدق التفاصيل .. * صحيح أن العطور حلوة وتجنن ومهمة لكن التعطير سلاح ذو حدين .. أولا لازم تكونين عارفة وش الروايح اللي يحبها وقت الملكه .. وتحرصين على ارضاء ذائقته بها .. والأهم أن في اللحظات الخاصه لاتخلين ريحه عطرك صارخه ولا خانقه .. لأنها راح تطغى على ريحه جسدك الخاصه .. غير كذا جسمك لازم يكون خالي تماما من أي رشه عطر .. والإكتفاء بتعطير الملابس فقط قبل لبسها .. وراح تعرفين السبب بعدين , ههههه * الرجل الشرقي يظل فية خصله لايمكن يتخلص منها .. وهي انه مايحب الجرأة الزايدة في الليله الأولى بالذات .. وممكن يسوقه مخه لو كان مصّدي لتفسيرات مالها داعي .. لذلك حافظي على أكبر قدر ممكن من الحياء والخجل حتى لو كان مبالغ فية . ولاحقه على الجرأه *حلو أن شريكك يلاحظ لمساتك وذوقك بالترتيب من أول يوم .. لأن مثل ماقلت لك الإنطباع الأول خطير جداً, وراح تكونين تحت المجهر من أول يوم .. حرصك على ترتيب كل شي في وقته وحرصك على النظافه مو بس عشانه ولا فكرته عنك , لا, هالشي هو اللي المفروض يصير .. انسي عيشتك في بيت أهلك وأني أنه فية ميري ولا سورياتي ممكن ترتب وراك ولا تغسل وراك .. مع أن هالشي مهوب عذر بنوب .. بس خلاص .. انتي في مرحله جديدة محتاجه اثبات وجودك والشغل في بيتك والقيام بشؤون زوجك مهوب عيب , بالعكس , التمسي المتعه حتى في أصعب اعمالك .. لإن الإيحاآت الإيجابيه مهمة عشان ماتصابين بالإحباط .. * لاتكشفين كل أمورك الخاصه وأمور عيلتك في أول لياليكم .. خلي بعض الأمور الشخصيه مؤجله لين تعرفين هالشريك هو قد الثقه ولا لا .. بعض الحريم من أول ليلتين تسدح كل مافي جعبتها من انولدت لين تزوجت .. وحتى اسرار اهلها تقولها , ولين ماأتفقوا وانفصلو قام يتكلم عنها وعن اهلها .. وكثير صارت ! الثقه ماتنعطى لأي شخص كان في يوم وليله .. فلاتصيرين ساذجه * فية حريم وبدافع مايسمى الخجل تصنع من زوجها رجل بخيل ماديا بدون ماتحس .. تجلس اول الأشهر كل مابغت شي طلبت من اهلها .. والسبب (مستحيه أقوله ) والنتيجه .. الرجال ينبسط على التوفير , ويتعود على انها انسانه مالها اي متطلبات .. وحليني عاد لين راح عنها هالخجل تطلع منه ريال واحد .. لازم تعودينه أن لك التزامات واحتياجات ماديه .. طبعاً بما يتناسب مع مدخوله الشهري .. مو معناه انك تصلخين الرجال بالصرف وتخلينه يتسلف .. الشي قدر .. على قد دخلة يعطيك .. حتى في المشاوير , لو عودتيه ان اخوانك يودونك ويجيبونك راح يتعود وينبسط على الراحه .. لازم يعرف أن الحياه آخذ وعطاء .. وانه ملزوم بمشاويرك والتزاماتك .. وانك طلعتي من ذمه آهلك لذمته . * لاتتوقعين ان طلباتك ماتتحقق غير بالقوة وفرض الأوامر .. بالذات لو كان شريكك عصبي المزاج لازم تعرفين من أين تؤكل الكتف .. واللسان مجرد آداه .. يطلع منها الكلام الزين والكلام الشين .. يبقى عاد اخلاقك وتربيتك ويش تختار لك منه .. العناد صفه غالبه على الرجال .. ودائماً يسعى للحفاظ على صورة الأسد في نظر نفسه حتى لو كان أرنب فعطية جوة .. خليه يحس أنك ماكسرتي كلامه .. بس بنفس الوقت تقدرين لين روق ناخذين اللي تبين . وصدقيني ترى كم دمعه حتى لو كانت من شمة بصل .. لها مفعول أقوى من اللعلعه والصوت العالي .. * لكن مايعني هالكلام أنك تكونين متنازله على طول الخط عن حقوقك .. انا ضد استخدام الصوت العالي واللسان البذئ لأخذ حق .. لكن ضد التنازل عن حق من الحقوق .. والتنازلات ترى تبدأ على مراحل .. وتتطور بدون ماتحسين.. ومازلت اشوف حريم يخطي عليها الزوج ويضربها وبعد مايقول لها كلمه حلوة تسيح معاه وتنسى اللي سواة .. لا ياعزيزتي ثقي تماماً أن أول مدة يد في حياتك الزوجيه ماراح تكون الأخيرة لو ماأتخذتي موقف حازم وصارم ومافية أي تراجع .. ولاتخلين لاعيال ولا غيرة سبب تتذرعين به عشان تتنازلين عيالك مايبون ام انهزامية تنضرب قدامهم وتنهان بالساعه والدقيقه ..كل شي ولا كرامتك . لو قبرتيها بتكونين انتهيتي . *اهتمامك بأدق تفاصيل بيتك وأحتياجات زوجك راح يخليه يعتمد عليك شوي شوي ويوليك القياده مع مرور الوقت لو اثبتي نفسك وجدارتك بقياده المنزل . *الزوج مثل الطفل .. باختلاف الحجم فقط .. محتاج صبر ومحتاج دلال ويحب شد انتباهك حتى برفضة لطلباتك أحياناً .. *احترامك لأهل زوجك وبالذات أمه هو من حقوق زوجك عليك , ولو بغيتي تكسبين زوجك أكرمي أهله حتى لو مابين لك أمتنانه , هالشي راح تلاحظينه بتصرفاته .. لأن الرجل الشرقي نادراً مايبدي امتنانه واعتذاره . * في كل لحظة سوء فهم بينكم .. تداركو الآمر قبل يستفحل .. وعالجوا الخلاف الصغير قبل يكبر ولابد من تخصيص لحظات نقاش عقلاني بدون محاوله كل طرف تبرير تصرفه أو تبرئه ساحته . * احتياجاتكم الخاصه والحميمه لازم تناقشونها بكل شفافيه .. وكل طرف يعرف وش له ووش عليه لأن هالأمور لو ماصار فيها اكتفاء راح تكون فجوة كبيره بحياتكم .. والنهايه أن كل طرف ناقصه شي راح يبحث عنه خارج الحدود .. حتى لو بمجرد النظر المحرم .. * اسقطي حواجز الخجل بينكم خلال الشهر الأول .. وبالتدريج .. لأن لكل منكم حقوق في جسد الآخر وكل ماطولت هالحواجز كل ماكان سقوطها أصعب .. *كونك تحتفظين ببعض خصوصياتك عن زوجك مو معناه أن الكذب محبذ دخوله بينكم ..اكرة صفه في الوجود هي الكذب .. وفية فرق من إخفاء حقيقة وبين تزييفها .. النهايهة } لقد حاولت قد الإمكان اسوي الموضوعع شامل كامل .. بالرغم آني آرى أنني ماقدرت أغطي كل جوانبه لسبب طوله وطول النقاش فيهه .. لكن على الأقل حاولت وأرى لابأس بمحاولتي .. ويارب تكون هالمحاوله مفيدة لأغلب العرايس .. ويارب أكون وفقت في طرحه وتنسيقه بتبسيط هم التجهيز المؤرق لكل عروس .. والله يوفقكم يارب ~ * عند النقل الرجاء ذكر المصدر تم بحمدالله وتوفيقه }

طْرَحَ فِيَ غْآَيُةَ آَلْرِوَعْهَ وِآَلِجْمُآَآَلَ وِفُقْتِيَ كِثْيُرِاً عِلْىَ هْذِآَآَ آَلأَنِتُقْآَءَ