ديوان مساعد الرشيدي

من اشعاره

كلك تعالي غلا ... والاارجعي كلك

بعض الغلا منك مايستاهل الجيه

طالت وانا في رجا ليتك..وياعلك

أوراق بالذاكره ..واوراق منسيه

مابل ثوبك مطر شوقي ولابلك

لوعلتك من سحاب الروح وسميه

ليه امشي الدرب دامه مايوصل لك

تخاف رمضا الضياع اقدام رجليه

يابنت تو الهوى ماصرت انا خلك

للحين .. مازالت الصوره رماديه

ومازال بغض الغموض الشره يحتلك

وشلون انا اعشقك واحبك على النيه

اشوفك هناك قدامي .. ولاادلك

صعب الكتابه ليا صار الورق ميه

إن كان شمسك تساومني على ضلك

ماعاد ابي منك لا شمس .. ولافيه

اما تعالي لقلبٍ .. فز لك كلك

والا اتركيني ما ابي لك بالهوى جيه

البارحة كل رمش سل شلفاه

وانا على نيتي ساهي وشارد

مسرح وجمهور متبلد وملهاه

يوم انت تطعن حشاي بدم بارد

ياسيدي من يقول الموت مأساه

والموت بغضايتك خيل تطارد

ماعندك الا حلالك وحلا لاه

لي اركيت قلبي على سود المبارد

الرمش طاغي وانا ماني بوياه

صدرت ضامي غلاك وجيت وارد

شبيك لبيك قلب العبد لله

بين اصبعينك غدا خادم ومارد

اطلب وتدلل فداك اللي تمناه

لو تطلب الشمس وسهيل وعطارد

في زمان كنه البرد .. شبيت القصيد

قلت ابدفا والليالي تموت ببردها

في طريق كنه الموت والحالي وحيد

قلت ابحيا والمنايا تبوح بسدها

أتقارب هقوة العمر لو كانت بعيد

واتغني بالمقابيل واخطب ودها

لاقديم الجرح يقوى ولاجرح الجديد

يخلف الناس العزيزه عن اللي ودها

والله اني ماتنازل .. لي رايٍ عنيد

لين أداعب غرة الشمس ..والثم خذها

وانزفي ياوردة الشعر .. من دم الوريد

لاتجفي في عروقٍ .. تراجف يدها

ياقصيدي كان الأشعار سادات وعبيد

والله انك من بحور ..غريبٍ جدها

ماتقاود مهرة الحرف للقلب البليد

ياقصيدي خذ رسنها ..وخلك قدها

في طريق كنه الخوف سليت القصيد

قلت ابحيا والليالي تموت ببردها